மாண்புமிகு மக்கள் இயக்கம்

மே மாத இறுதிக்குள் நமது தன்னர்வலர்களின் எண்ணிக்கையை நான்கு இலக்கத்தை அடைய முயற்சிப்பது....

ஒவ்வொரு மாவட்ட ஒருங்கிணைப்பாளரும் , தமது மாவட்டத்தில் உள்ள ஒவ்வொரு வட்டத்திலும், வட்டார அளவிலும் குறைந்தது ஒரு தன்னார்வலரை நமது இயக்கத்திற்கு அறிமுகப்படுத்துவது...

இணைய தளத்தில் உள்ள ஒவ்வொரு ஆவணத்தைப்பற்றிய முழு விபரங்களையும், பொதுநலன் சார்ந்த மனுக்களை சமர்ப்பிப்பது குறித்தும் முழுமையான புரிதலை பெறுவது....

சீரிய இடைவெளியில் நடைபெறும் மாவட்ட ஒருங்கிணைப்பாளர்கள் இணைய வழி கூடுதலில் பங்கேற்பது...

ஆக்கபூர்வமான கருத்துக்களையும், செயல்பாடுகளுக்கான முன்னெடுப்புகளையும் Feed Back மூலம் நமது இணைய தளத்தில் பதிவேற்றம் செய்வது...

விரைவில் மாவட்ட ஒருங்கிணைப்பாளர்களின் நேரடி சந்திப்பின் வாயிலாக ஒருவரை ஒருவர் நேரடியாக சந்திப்பதற்கான வாய்ப்பை உருவாக்குவது...

மாண்புமிகு மக்கள் இயக்கம்
Maanbumigu Makkal Movement | maanbumigumakkal.com

மாவட்ட ஒருங்கிணைப்பாளர்களுக்கு— ஒரு உள்ளம் கனிந்த அழைப்பு —

அன்பான மாவட்ட ஒருங்கிணைப்பாளர்களுக்கு,
வணக்கம்.

நீங்கள் இன்று ஒரு சாதாரண பணியை ஏற்கவில்லை. ஒரு வரலாற்று இயக்கத்தின் முதுகெலும்பாக நிற்கிறீர்கள்.

நாம் ஏன் இங்கே நிற்கிறோம்?

தமிழகத்தில் இன்றும் எத்தனையோ மாண்புமிகு குடியரசர்களாகிய நாம் , நமது வரிப்பணத்தில் ஊதியம் பெறும், அரசு பணியாளர்களிடம் அரசமைப்பு சாசனம் வழங்கியுள்ள நமது உரிமைகளை பெறுவதற்காக அரசு அலுவலகங்களில் தலை குனிந்து நிற்க வேண்டிய அவல நிலை.

➤ பட்டா வேண்டுமா — இடைத்தரகர் இல்லாமல் நடப்பது கடினம் .

➤ சாதி சான்று வேண்டுமா — கையூட்டு இல்லாமல் கிடைத்தால் நீங்கள் அதிர்ஷ்டசாலி .

➤ குழந்தை பிறப்புச் சான்று வேண்டுமா — எதையோ எதிர்பார்த்து தேவையற்ற வகையில் கால தாமதப்படுத்துவது.

இவையெல்லாம் அன்றாட நிகழ்வுகள் மட்டுமல்ல , நாமும் இதற்கு பழகிப்போய் விட்டோம்.

இது தவறு. இது மக்களின் மாண்பை மிதிக்கும் செயல்.

ஆனால் நாம் இதை மாற்றலாம். மாற்றுவோம். அதற்காகவே மாண்புமிகு மக்கள் இயக்கம் உங்களுக்கு வழிகாட்டுகிறது.


நமது இயக்கத்தின் மாவட்ட ஒருங்கிணைப்பாளர்கள் குறித்த பெயர் , தொடர்பு எண் ஆகிய விபரங்கள் https://maanbumigumakkal.com/about-us என்ற இணையதளத்தில் பார்வையிடலாம்.

நீங்கள் ஒவ்வொருவரும் உங்கள் மாவட்டத்தில் ஒரு விளக்கு (Torch Light). ஆனால் ஒரே ஒரு விளக்கால் இருளைப் போக்க முடியாது.

தாலுகா தோறும் ஒரு விளக்கேற்ற வேண்டும். அந்த விளக்குகளில் இருந்து கிராம அளவில் ஒளி பரவ வேண்டும்.

அதற்காக நீங்கள் செய்ய வேண்டியது ஒன்றே ஒன்றுதான் — சரியான மனிதர்களை தாலுகா தோறும் அடையாளம் காணுங்கள்.

இதற்கான தரவுகளை ஏற்கனவே மண்டல ஒருங்கிணைப்பாளர்கள் தங்களுக்கு பகிர்ந்துள்ளனர் ..

பதவிக்காக அல்ல, பணத்திற்காக அல்ல — பொது நலனில் மனசாட்சியுள்ள ஒருவரை தேடுங்கள்.

➤ அவர் ஒரு ஆசிரியராக இருக்கலாம்.
➤ ஒரு
விவசாயியாக இருக்கலாம்.
➤ ஒரு இளைஞனாக இருக்கலாம்.
ஆனால் அவரிடம் இருக்க வேண்டியது ஒரே ஒரு குணம் — மக்களுக்கான அக்கறை. தாலுகா ஒருங்கிணைப்பாளர்களை உருவாக்குவதே நமக்கு முன்பாக உள்ள தற்போதைய தலையாய பணி.

சமூக தணிக்கை — இது ஒரு போராட்டம் அல்ல, இது ஒரு பொறுப்பு.

நாம் யாரையும் எதிரியாக பார்க்கவில்லை. அரசு அலுவலகங்கள் மக்களுக்காக சேவை செய்ய உருவாக்கப்பட்டவை.

அரசு ஆணைகள் மக்களுக்காகவே எழுதப்பட்டவை. அவை காகிதத்தில் மட்டுமே உறங்காமல் ., உண்மையில் நடைமுறைப்படுத்தப்படுகிறதா என்று உறுதி செய்வதே சமூக தணிக்கை.

➤ நமது நோக்கம் அவர்கள் மீது குற்றம் சாட்டுவது அல்ல — அவர்களது கடமையை நினைவூட்டுகிறோம்.

➤ நமது செயல் அவர்களை பகைவர்களாக நோக்குவது அல்ல — அவர்களை பங்காளர்களாக இணைப்பதற்கான முயற்சி.

➤ நாம் குடியரசர்கள் என்ற அதிகாரத்தை காட்டவில்லை — நாம் நேர்மையை நிலைநிறுத்துவதற்கு முயல்கிறோம்.



குழுவாக இயங்குவதே நம் பலம்

தனி மரம் தோப்பாகாது. நம் இயக்கம் ஒரு தனி மனிதனின் புகழுக்காக இல்லை. இது மக்களால், மக்களுக்காக, மக்களுடன் நடைபெறுகிறது.

மாவட்ட ஒருங்கிணைப்பாளராகிய நீங்கள் —
➤ உங்கள் மாவட்டத்தில் உள்ள ஒவ்வொரு தாலுகா ஒருங்கிணைப்பாளருக்கும் வழிகாட்டுங்கள்.
➤ அந்த தாலுகா ஒருங்கிணைப்பாளர்கள் ஒவ்வொரு கிராமத்திலும் விழிப்புணர்வுள்ள குடியரசர்களை தன்னார்வலராக மாற்றுவார்.
➤ அந்த கிராமத்தில் உள்ள தன்னார்வலர்கள் விழிப்புணர்வுடன் செயல்பட்டு ஒவ்வொரு அரசு பணியாளரையும் பொறுப்புடன் செயல்பட வைப்பார்.
➤இந்த கூட்டு முயற்சி ஒரு பொறுப்புள்ள மக்களாட்சியை உறுதிசெய்யும்..

இப்படி ஒரு மாற்றத்தின் சங்கிலி உருவாகும்.
✨ நினைவில் வையுங்கள்
"பதவியில் இருப்பவர் 5 ஆண்டுகளுக்குத் தான் மாண்புமிகு... ஆனால், கடமையைச் சரியாகச் செய்யும் குடிமகன் வாழ்நாள் முழுவதும் மாண்புமிகு!"

நீங்கள் இன்று ஏற்றுக்கொண்டுள்ள இந்த பொறுப்பு, எந்த அரசியல் கட்சியாலும் உங்களுக்கு வழங்க இயலாது. உங்களின் செயல்பாடுகளால் உங்களுக்கு கிடைக்கவுள்ள நிரந்தர மாண்புமிகு என்ற மரியாதையை உங்களிடம் இருந்து யாராலும் பறிக்க இயலாது.

நீங்கள் எடுத்துவைக்கும் ஒவ்வொரு அடியும் ஆயிரம் குடிமக்களின் வாழ்வை சீர்படுத்தும்.
உங்கள் ஒவ்வொரு தன்னார்வலர் தேர்வும் மாண்புமிகு குடியரசர்கள் நிறைந்த ஒரு சிறந்த மக்களாட்சியை கட்டமைப்பதற்கான விதை.
வாருங்கள், கரம் கோர்ப்போம். மாற்றத்தை உருவாக்குவோம்.

அன்புடன், maanbumigumakkal.com
மாண்புமிகு மக்கள் இயக்கம் support@maanbumigumakkal.com

Siva Krishnan